shab-e-dard-o-gham se arsa mere ji pe tang tha

shab-e-dard-o-ġham se arsa mire jī pe tañg thā

aayā shab-e-firāq thī yā roz-e-jañg thā

kasrat meñ dard-o-ġham kī na niklī koī tapish

kūcha jigar ke zaḳhm kā shāyad ki tañg thā

laayā mire mazār pe us ko ye jazb-e-ishq

jis bevafā ko naam se bhī mere nañg thā

dekhā hai said-gā meñ tire said kā jigar

bā-āñki chhin rahā thā pe zauq-e-ḳhadañg thā

dil se mire lagā na tirā dil hazār haif

ye shīsha ek umr se mushtāq-e-sañg thā

mat kar ajab jo 'mīr' tire ġham meñ mar gayā

jiine kā is marīz ke koī bhī Dhañg thā

shab-e-dard-o-gham se arsa mere ji pe tang tha

aaya shab-e-firaq thi ya roz-e-jang tha

kasrat mein dard-o-gham ki na nikli koi tapish

kucha jigar ke zaKHm ka shayad ki tang tha

laya mere mazar pe us ko ye jazb-e-ishq

jis bewafa ko nam se bhi mere nang tha

dekha hai said-ga mein tere said ka jigar

ba-anki chhin raha tha pe zauq-e-KHadang tha

dil se mere laga na tera dil hazar haif

ye shisha ek umr se mushtaq-e-sang tha

mat kar ajab jo 'mir' tere gham mein mar gaya

jine ka is mariz ke koi bhi Dhang tha