shaiKH ji aao musalla giro jam karo

shaiḳh jī aao musallā giro jaam karo

jins taqvā ke ta.iiñ sirf mai-e-ḳhām karo

farsh mastāñ karo sajjāda-e-be-tah ke ta.iiñ

mai kī tāzīm karo shīshe kā ikrām karo

dāman-e-pāk ko ālūda rakho baade se

aap ko muġhbachoñ ke qābil-e-dushnām karo

nek-nāmī-o-taqāvat ko duā jald kaho

dīn-o-dil pesh-kash sāda-e-ḳhud-kām karo

nañg-o-nāmūs se ab guzro javānoñ kī tarah

par fishānī karo aur saaqī se ibrām karo

ḳhuub agar jur.a -mai-nosh nahīñ kar sakte

ḳhātir-jam.a mai-āshām se ye kaam karo

uTh khaḌe ho jo jhuke gardan-e-mīnā-e-sharāb

ḳhidmat-e-bāda-gusārāñ hī sar-anjām karo

mutrib aa kar jo kare chañg-navāzī to tum

pairahan mastoñ kī taqlīd se in.aam karo

ḳhunkī itnī bhī to lāzim nahīñ is mausam meñ

paas josh-e-gul-o-dil garmī-e-ayyām karo

sāya-e-gul meñ lab-e-jū pe gulābī rakho

haath meñ jaam ko lo aap ko badnām karo

āh-e-tā-chand raho ḳhānaqah-o-masjid meñ

ek to sub.h-e-gulsitāñ meñ bhī shaam karo

raat to saarī ga.ī sunte pareshāñ-goī

'mīr'-jī koī ghaḌī tum bhī to ārām karo

shaiKH ji aao musalla giro jam karo

jins taqwa ke tain sirf mai-e-KHam karo

farsh mastan karo sajjada-e-be-tah ke tain

mai ki tazim karo shishe ka ikram karo

daman-e-pak ko aaluda rakho baade se

aap ko mughbachon ke qabil-e-dushnam karo

nek-nami-o-taqawat ko dua jald kaho

din-o-dil pesh-kash sada-e-KHud-kaam karo

nang-o-namus se ab guzro jawanon ki tarah

par fishani karo aur saqi se ibram karo

KHub agar jura -mai-nosh nahin kar sakte

KHatir-jama mai-asham se ye kaam karo

uTh khaDe ho jo jhuke gardan-e-mina-e-sharab

KHidmat-e-baada-gusaran hi sar-anjam karo

mutrib aa kar jo kare chang-nawazi to tum

pairahan maston ki taqlid se inam karo

KHunki itni bhi to lazim nahin is mausam mein

pas josh-e-gul-o-dil garmi-e-ayyam karo

saya-e-gul mein lab-e-ju pe gulabi rakho

hath mein jam ko lo aap ko badnam karo

aah-e-ta-chand raho KHanaqah-o-masjid mein

ek to subh-e-gulsitan mein bhi sham karo

raat to sari gai sunte pareshan-goi

'mir'-ji koi ghaDi tum bhi to aaram karo