subh hui gulzar ke tair dil ko apne TaTolen hain

sub.h huī gulzār ke taa.ir dil ko apne TaToleñ haiñ

yaad meñ us ḳhud-rau gul-e-tar kī kaise kaise boleñ haiñ

baaġh meñ jo ham dīvāne se jā nikleñ haiñ nālā-kunāñ

ġhunche ho ho murġh chaman ke saath hamāre ho leñ haiñ

yaar hamārā āsāñ kyā kuchh siina kushāda ham se milā

ḳhuun kareñ haiñ jab dil ko ve band qabā ke kholeñ haiñ

miiñh jo barse hai shiddat se dekh añdherī kiyā hai ye

ya.anī tang jo ham aate haiñ dil ko khol ke ro leñ haiñ

vo dhobī kā kam miltā hai mail-e-dil ūdhar hai bahut

koī kahe us se milte meñ tujh ko kyā ham dho leñ haiñ

sarv to hai sanjīda lekin pesh-e-misra-e-qadd-e-yār

nā-mauzūñ hī nikle hai jab dil meñ apne toleñ haiñ

marg kā vaqfa is raste meñ kyā hai 'mīr' samajhte ho

hāre-māñde raah ke haiñ ham log koī dam so leñ haiñ

subh hui gulzar ke tair dil ko apne TaTolen hain

yaad mein us KHud-rau gul-e-tar ki kaise kaise bolen hain

bagh mein jo hum diwane se ja niklen hain nala-kunan

ghunche ho ho murgh chaman ke sath hamare ho len hain

yar hamara aasan kya kuchh sina kushada hum se mila

KHun karen hain jab dil ko we band qaba ke kholen hain

minh jo barse hai shiddat se dekh andheri kiya hai ye

yani tang jo hum aate hain dil ko khol ke ro len hain

wo dhobi ka kam milta hai mail-e-dil udhar hai bahut

koi kahe us se milte mein tujh ko kya hum dho len hain

sarw to hai sanjida lekin pesh-e-misra-e-qadd-e-yar

na-mauzun hi nikle hai jab dil mein apne tolen hain

marg ka waqfa is raste mein kya hai 'mir' samajhte ho

haare-mande rah ke hain hum log koi dam so len hain