ta-chand intizar-e-qayamat shitab ho

tā-chand intizār-e-qayāmat shitāb ho

vo chāñd sā jo nikle to raf'-e-hijāb ho

ahvāl kī ḳharābī mirī pahuñchī is sire

is par bhī vo kahe hai abhī Tuk ḳharāb ho

yaañ āñkheñ muñdte der nahīñ lagtī merī jaañ

maiñ kaan khole rakhtā huuñ tere shitāb ho

phūloñ ke 'aks se nahīñ jū-e-chaman meñ rang

gul bah chale haiñ sharm se us muñh kī aab ho

yaañ jurm ginte uñgliyoñ ke ḳhat bhī miT ga.e

vaañ kis tarah se dekheñ hamārā hisāb ho

ġhaflat hai apnī 'umr se tum ko hazār-haif

ye kārvān jaane pe tum mast-e-ḳhvāb ho

shān-e-taġhāful us kī likhī ham se kab ga.ī

jab nāma-bar halāk ho tab kuchh javāb ho

lutf-e-sharāb abr se hai so nasīb dekh

jab leveñ jaam haath meñ tab āftāb ho

hastī par ek dam kī tumheñ josh is qadar

is bahr-e-mauj-ḳhez meñ tum to habāb ho

jī chāhtā hai 'aish kareñ ek raat ham

tū hove chāñdnī ho gulābī sharāb ho

pur-pech-o-tāb dūd-e-dil apnā hai jaise zulf

jab is tarah se jal ke darūna kabāb ho

aage zabān-e-yār ke ḳhat khīñche sab ne 'mīr'

pahlī jo baat us kī kaheñ to kitāb ho

ta-chand intizar-e-qayamat shitab ho

wo chand sa jo nikle to raf'-e-hijab ho

ahwal ki KHarabi meri pahunchi is sire

is par bhi wo kahe hai abhi Tuk KHarab ho

yan aankhen mundte der nahin lagti meri jaan

main kan khole rakhta hun tere shitab ho

phulon ke 'aks se nahin ju-e-chaman mein rang

gul bah chale hain sharm se us munh ki aab ho

yan jurm ginte ungliyon ke KHat bhi miT gae

wan kis tarah se dekhen hamara hisab ho

ghaflat hai apni 'umr se tum ko hazar-haif

ye karwan jaane pe tum mast-e-KHwab ho

shan-e-taghaful us ki likhi hum se kab gai

jab nama-bar halak ho tab kuchh jawab ho

lutf-e-sharab abr se hai so nasib dekh

jab lewen jam hath mein tab aaftab ho

hasti par ek dam ki tumhein josh is qadar

is bahr-e-mauj-KHez mein tum to habab ho

ji chahta hai 'aish karen ek raat hum

tu howe chandni ho gulabi sharab ho

pur-pech-o-tab dud-e-dil apna hai jaise zulf

jab is tarah se jal ke daruna kabab ho

aage zaban-e-yar ke KHat khinche sab ne 'mir'

pahli jo baat us ki kahen to kitab ho