teri gali se jab hum azm-e-safar karenge

terī galī se jab ham azm-e-safar kareñge

har har qadam ke uupar patthar jigar kareñge

āzurda-ḳhātiroñ se kyā fā.eda suḳhan kā

tum harf sar karoge ham girya sar kareñge

uzr-e-gunāh-e-ḳhūbāñ bad-tar gunah se hogā

karte hue talāfī be-lutf-tar kareñge

sar jā.egā va-lekin āñkheñ udhar hī hoñgī

kyā terī teġh se ham qat-e-nazar kareñge

apnī ḳhabar bhī ham ko ab der pohñchtī hai

kyā jaane yaar us ko kab tak ḳhabar kareñge

gar dil kī tāb-o-tāqat ye hai to ham-nashīñ ham

shām-e-ġham-e-judā.ī kyūñkar sahar kareñge

ye zulm-e-be-nihāyat dekho to ḳhūb-rūyāñ

kahte haiñ jo sitam hai ham tujh hī par kareñge

apne bhī jī hai āḳhir insāf kar ki kab tak

tū ye sitam karegā ham darguzar kareñge

sannā.a-e-turfa haiñ ham aalam meñ reḳhte ke

jo 'mīr' jī lagegā to sab hunar kareñge

teri gali se jab hum azm-e-safar karenge

har har qadam ke upar patthar jigar karenge

aazurda-KHatiron se kya faeda suKHan ka

tum harf sar karoge hum girya sar karenge

uzr-e-gunah-e-KHuban bad-tar gunah se hoga

karte hue talafi be-lutf-tar karenge

sar jaega wa-lekin aankhen udhar hi hongi

kya teri tegh se hum qat-e-nazar karenge

apni KHabar bhi hum ko ab der pohnchti hai

kya jaane yar us ko kab tak KHabar karenge

gar dil ki tab-o-taqat ye hai to ham-nashin hum

sham-e-gham-e-judai kyunkar sahar karenge

ye zulm-e-be-nihayat dekho to KHub-ruyan

kahte hain jo sitam hai hum tujh hi par karenge

apne bhi ji hai aaKHir insaf kar ki kab tak

tu ye sitam karega hum darguzar karenge

sannaa-e-turfa hain hum aalam mein reKHte ke

jo 'mir' ji lagega to sab hunar karenge