tha shauq mujhe talib-e-didar hua main

thā shauq mujhe tālib-e-dīdār huā maiñ

so aa.ina sā sūrat-e-dīvār huā meñ

jab duur gayā qāfila tab chashm huī baaz

kyā pūchhte ho der ḳhabar-dār huā maiñ

ab past-o-buland ek hai juuñ naqsh-e-qadam yaañ

pāmāl huā ḳhuub to hamvār huā maiñ

kab naaz se shamshīr-e-sitam un ne na khīñchī

kab zauq se marne ko na tayyār huā maiñ

bāzār-e-vafā meñ sar-e-saudā thā sabhoñ ko

par bech ke jī ek ḳharīdār huā maiñ

hushiyār the sab daam meñ aa.e na ham-āvāz

thī raftagī sī mujh ko giraftār huā maiñ

kyā chetne kā fā.eda jo sheb meñ chetā

sone kā samāñ aaya to bedār huā maiñ

tum apnī kaho ishq meñ kyā pūchho ho merī

izzat ga.ī rusvā.ī huī ḳhvār huā maiñ

us nargis-e-mastāna ko dekhe hue barsoñ

ifrāt se andoh kī bīmār huā maiñ

rahtā huuñ sadā marne ke nazdīk hī ab 'mīr'

us jaan ke dushman se bhalā yaar huā maiñ

tha shauq mujhe talib-e-didar hua main

so aaina sa surat-e-diwar hua mein

jab dur gaya qafila tab chashm hui baz

kya puchhte ho der KHabar-dar hua main

ab past-o-buland ek hai jun naqsh-e-qadam yan

pamal hua KHub to hamwar hua main

kab naz se shamshir-e-sitam un ne na khinchi

kab zauq se marne ko na tayyar hua main

bazar-e-wafa mein sar-e-sauda tha sabhon ko

par bech ke ji ek KHaridar hua main

hushiyar the sab dam mein aae na ham-awaz

thi raftagi si mujh ko giraftar hua main

kya chetne ka faeda jo sheb mein cheta

sone ka saman aaya to bedar hua main

tum apni kaho ishq mein kya puchho ho meri

izzat gai ruswai hui KHwar hua main

us nargis-e-mastana ko dekhe hue barson

ifraat se andoh ki bimar hua main

rahta hun sada marne ke nazdik hi ab 'mir'

us jaan ke dushman se bhala yar hua main