uchaTti si lagi apne to wo talwar ya qismat

uchaTtī sī lagī apne to vo talvār yā qismat

hue jis ke lage kār-āmada bekār yā qismat

hue jab sau javāñ yakjā tavaqqo sī huī ham ko

nigah-tez un ne so īdhar na kī do baar yā qismat

paḌā saaya na us kī teġh-e-ḳhūñ-ālūda kā sar par

kiye haiñ yuuñ to qismat un ne kyā kyā vaar yā qismat

rahā thā zer-e-dīvār us kī maiñ barsāt meñ jā kar

girī us miiñh meñ sar par vahī dīvār yā qismat

mue ham tishna-lab dīdār ke hālāñki giryāñ the

nasīb apne ki sūkhī chashm-e-dariyā-bār yā qismat

dar-e-masjid pe ho kar be-navā baiThe haiñ yā haadī

hamīñ the varna maiḳhāne meñ takiya-dār yā qismat

nasīboñ meñ hai jin ke aish vo bhī 'mīr' jiite haiñ

jiye haiñ ham bhī jo marne ko the tayyār yā qismat

uchaTti si lagi apne to wo talwar ya qismat

hue jis ke lage kar-amada bekar ya qismat

hue jab sau jawan yakja tawaqqo si hui hum ko

nigah-tez un ne so idhar na ki do bar ya qismat

paDa saya na us ki tegh-e-KHun-aluda ka sar par

kiye hain yun to qismat un ne kya kya war ya qismat

raha tha zer-e-diwar us ki main barsat mein ja kar

giri us minh mein sar par wahi diwar ya qismat

mue hum tishna-lab didar ke haalanki giryan the

nasib apne ki sukhi chashm-e-dariya-bar ya qismat

dar-e-masjid pe ho kar be-nawa baiThe hain ya hadi

hamin the warna maiKHane mein takiya-dar ya qismat

nasibon mein hai jin ke aish wo bhi 'mir' jite hain

jiye hain hum bhi jo marne ko the tayyar ya qismat