یار ہے میرؔ کا مگر گل سا

یار ہے میرؔ کا مگر گل سا

کہ سحر نالہ کش ہے بلبل سا

یاں کوئی اپنی جان دو دشوار

واں وہی ہے سو ہے تساہل سا

دود دل کو ہمارے ٹک دیکھو

یہ بھی پر پیچ اب ہے کاکل سا

شوق واں اس کے لمبے بالوں کا

یاں چلا جائے ہے تسلسل سا

کب تھی جرأت رقیب کی اتنی

تم نے بھی کچھ کیا تغافل سا

اک نگہ ایک چشمک ایک سخن

اس میں بھی تم کو ہے تامل سا

بارے مستوں نے ہوشیاری کی

دے کے کچھ محتسب کا منہ جھلسا

شرم آتی ہے پہنچتے اودھر

خط ہوا شوق سے ترسل سا

ٹوٹی زنجیر پائے میرؔ مگر

رات سنتے رہے ہیں ہم غل سا