yar hai mir ka magar gul sa

yaar hai 'mīr' kā magar gul sā

ki sahar nāla-kash hai bulbul sā

yaañ koī apnī jaan do dushvār

vaañ vahī hai so hai tasāhul sā

dūd-e-dil ko hamāre Tuk dekho

ye bhī pur-pech ab hai kākul sā

shauq vaañ us ke lambe bāloñ kā

yaañ chalā jaa.e hai tasalsul sā

kab thī jur.at raqīb kī itnī

tum ne bhī kuchh kiyā taġhāful sā

ik nigah ek chashmak ek suḳhan

is meñ bhī tum ko hai ta.ammul sā

baare mastoñ ne hoshiyārī kī

de ke kuchh mohtasib kā muñh jhulsā

sharm aatī hai pohñchte ūdhar

ḳhat huā shauq se tarassul sā

TuuTī zanjīr-e-pā-e-'mīr' magar

raat sunte rahe haiñ ham ġhul sā

yar hai 'mir' ka magar gul sa

ki sahar nala-kash hai bulbul sa

yan koi apni jaan do dushwar

wan wahi hai so hai tasahul sa

dud-e-dil ko hamare Tuk dekho

ye bhi pur-pech ab hai kakul sa

shauq wan us ke lambe baalon ka

yan chala jae hai tasalsul sa

kab thi jurat raqib ki itni

tum ne bhi kuchh kiya taghaful sa

ek nigah ek chashmak ek suKHan

is mein bhi tum ko hai tammul sa

bare maston ne hoshiyari ki

de ke kuchh mohtasib ka munh jhulsa

sharm aati hai pohnchte udhar

KHat hua shauq se tarassul sa

TuTi zanjir-e-pa-e-'mir' magar

raat sunte rahe hain hum ghul sa