yarab koi diwana be-Dhang sa aa jawe

yārab koī dīvāna be-Dhang sā aa jaave

aġhlāl-o-salāsil Tuk apnī bhī hilā jaave

ḳhāmosh raheñ kab tak zindān-e-jahāñ meñ ham

hangāma qayāmat kā shorish se uThā jaave

kab 'ishq kī vaadī hai sar khīñchne kī jāgah

ho sail bhalā sā to muñh moḌ chalā jaave

'āshiq meñ hai aur us meñ nisbat sag-o-āhū kī

juuñ juuñ ho ramīda vo tuuñ tuuñ ye lagā jaave

afsos kī jāgah hai yaañ bāz-pasīñ dam meñ

ho rū-barū ā.īna vo muñh ko chhupā jaave

in nau-ḳhatoñ se merī qismat meñ to thī ḳhvārī

kis tarh likhā merā koī aa ke miTā jaave

dekh us ko Thahar rahnā sābit-qadamoñ se ho

is raah se aave to ham se na rahā jaave

kahiye jahāñ kartā ho tāsīr suḳhan kuchh bhī

vo baat nahīñ suntā kyā us se kahā jaave

ye rang rahe dekheñ tā-chand ki vo ghar se

khātā huā paan aa kar bātoñ ko chabā jaave

ham der ke jangal meñ bhūle phire haiñ kab ke

kā'be kā hameñ rasta ḳhizr aa ke batā jaave

hāthoñ ga.ī ḳhūbāñ ke kuchh shai nahīñ phir miltī

kyūñkar koī ab un se dil merā dilā jaave

ye zehn-o-zakā us kā tā.īd udhar kī hai

Tuk hoñT hile to vo tah baat kī pā jaave

yuuñ ḳhat kī siyāhī hai gird us ruḳh-e-raushan ke

har chaar taraf gaahe juuñ badr ghirā jaave

kyā us kī galī meñ hai 'āshiq kisū kī rūyat

ālūda-e-ḳhāk aave lohū meñ nahā jaave

hai hausla terā hī jo tang nahīñ aatā

kis se ye sitam varna ai 'mīr' sahā jaave

yarab koi diwana be-Dhang sa aa jawe

aghlal-o-salasil Tuk apni bhi hila jawe

KHamosh rahen kab tak zindan-e-jahan mein hum

hangama qayamat ka shorish se uTha jawe

kab 'ishq ki wadi hai sar khinchne ki jagah

ho sail bhala sa to munh moD chala jawe

'ashiq mein hai aur us mein nisbat sag-o-ahu ki

jun jun ho ramida wo tun tun ye laga jawe

afsos ki jagah hai yan baz-pasin dam mein

ho ru-baru aaina wo munh ko chhupa jawe

in nau-KHaton se meri qismat mein to thi KHwari

kis tarh likha mera koi aa ke miTa jawe

dekh us ko Thahar rahna sabit-qadamon se ho

is rah se aawe to hum se na raha jawe

kahiye jahan karta ho tasir suKHan kuchh bhi

wo baat nahin sunta kya us se kaha jawe

ye rang rahe dekhen ta-chand ki wo ghar se

khata hua pan aa kar baaton ko chaba jawe

hum der ke jangal mein bhule phire hain kab ke

ka'be ka hamein rasta KHizr aa ke bata jawe

hathon gai KHuban ke kuchh shai nahin phir milti

kyunkar koi ab un se dil mera dila jawe

ye zehn-o-zaka us ka taid udhar ki hai

Tuk honT hile to wo tah baat ki pa jawe

yun KHat ki siyahi hai gird us ruKH-e-raushan ke

har chaar taraf gahe jun badr ghira jawe

kya us ki gali mein hai 'ashiq kisu ki ruyat

aaluda-e-KHak aawe lohu mein naha jawe

hai hausla tera hi jo tang nahin aata

kis se ye sitam warna ai 'mir' saha jawe