آج کچھ کرنا ہے اظہار رسول عربی

آج کچھ کرنا ہے اظہار رسول عربی

سنیے یا احمد مختار رسول عربی

آپ کی امت عاصی ہے بڑی زحمت میں

ان میں ہر شخص ہے اب خوار رسول عربی

ان میں باقی ہے نہ عزت نہ تمدن نہ وقار

یہ تو سب ہو چکے بے کار رسول عربی

دولت دین ہے ان میں نہ تو دنیا باقی

ان میں ہر ذات ہے نادار رسول عربی

زندہ یہ ہیں تو مگر زیست کا کچھ لطف نہیں

زیست سے اب ہیں یہ بیزار رسول عربی

آپ کے حکم کو ان سب نے بھلایا ہے حضور

اس کا سب کرتے ہیں اقرار رسول عربی

یہ برے ہیں کہ بھلے آپ کی امت ہیں ضرور

نگہ لطف ہے درکار رسول عربی

آپ سے ہم نہ کہیں جا کے تو پھر کس سے کہیں

آپ عالم کے ہیں مختار رسول عربی