آنکھوں میں کچھ اس طرح سما جائے مدینہ

آنکھوں میں کچھ اس طرح سما جائے مدینہ

دیکھوں میں جدھر مجھ کو نظر آئے مدینہ

ہے دل کے قریں برق تجلائے مدینہ

ہے صل علی انجمن آرائے مدینہ

میں مدح سرا جوش عقیدت سے ہوں ورنہ

یہ میری زباں اور سخن ہائے مدینہ

ہاں دل ہے وہی جس میں مدینے کی لگن ہو

ہاں سر ہے وہی جس میں ہو سودائے مدینہ

بڑھتا ہی رہے سلسلۂ شوق حضوری

اٹھتا ہی رہے درد تمنائے مدینہ

سمجھوں میں اسے معجزۂ قسمت‌ بیدار

مجھ کو جو نظر خواب میں آ جائے مدینہ

اک عمر سے بے چین بہت جان حزیںؔ ہے

بس اک نظر رحمت آقائے مدینہ