aankhon mein kuchh is tarh sama jae madina

āñkhoñ meñ kuchh is tarh samā jaa.e madīna

dekhūñ maiñ jidhar mujh ko nazar aa.e madīna

hai dil ke qarīñ barq-e-tajallā-e-madīna

hai sall-e-'alā anjuman-ārā-e-madīna

maiñ mad.h-sarā josh-e-‘aqīdat se huuñ varna

ye merī zabāñ aur suḳhan-hā-e-madīna

haañ dil hai vahī jis meñ madīne kī lagan ho

haañ sar hai vahī jis meñ ho saudā-e-madīna

baḌhtā hī rahe silsila-e-shauq-e-huzūrī

uThtā hī rahe dard-e-tamannā-e-madīna

samjhūñ maiñ ise mo'jiza-e-qismat-e-bedār

mujh ko jo nazar ḳhvāb meñ aa jaa.e madīna

ik 'umr se bechain bahut jān-e-'hazīñ' hai

bas ik nazar-e-rahmat-e-āqā-e-madīna

aankhon mein kuchh is tarh sama jae madina

dekhun main jidhar mujh ko nazar aae madina

hai dil ke qarin barq-e-tajalla-e-madina

hai sall-e-'ala anjuman-ara-e-madina

main madh-sara josh-e-‘aqidat se hun warna

ye meri zaban aur suKHan-ha-e-madina

han dil hai wahi jis mein madine ki lagan ho

han sar hai wahi jis mein ho sauda-e-madina

baDhta hi rahe silsila-e-shauq-e-huzuri

uThta hi rahe dard-e-tamanna-e-madina

samjhun main ise mo'jiza-e-qismat-e-bedar

mujh ko jo nazar KHwab mein aa jae madina

ek 'umr se bechain bahut jaan-e-'hazin' hai

bas ek nazar-e-rahmat-e-aqa-e-madina