اے مرے پاک پیمبر اے شہہ جن و بشر

اے مرے پاک پیمبر اے شہہ جن و بشر

نہیں دنیا میں کوئی تیرا نظیر و ہم سر

تو مری جان مری شان مری عزت ہے

میرا ایمان مرا مان مری نسبت ہے

میرا سمان مرا گیان مری دولت ہے

اہل اسلام کا اکلوتا ہے تو ہی دل بر

اے مرے پاک پیمبر اے شہہ جن و بشر

قطرہ قطرہ ہے جہاں اور سمندر ہے تو

اہل ایماں کے لیے ساقیٔ کوثر ہے تو

ہم گنہ گار ہیں اور شافع محشر ہے تو

سارے انسانوں کا جنوں کا تو ہی ہے رہبر

اے مرے پاک پیمبر اے شہہ جن و بشر

ترے طیبہ کی زیارت ہی سعادت ہے مری

تیری ہر آن غلامی میں سیادت ہے مری

ذکر کرنا ترا ہر دم یہی عادت ہے مری

سارے عالم میں نہیں کوئی بھی تجھ سے بہتر

اے مرے پاک پیمبر اے شہہ جن و بشر

اے مبشر اے معلم اے رسول رحمت

جان احسان خوش انداز سراپا راحت

تو محبت تو شرافت تو مکمل برکت

حشر میں تیری شفاعت سے سنور جائے سفر

اے مرے پاک پیمبر اے شہہ جن و بشر

ایک اک بات تری وحیٔ خدا ہوتی ہے

ساری مخلوق کو خالق کی ندا ہوتی ہے

بات حق ہی ترے ہونٹوں سے ادا ہوتی ہے

تجھ پہ قربان ہیں کاشفؔ کے دل و جان و جگر

اے مرے پاک پیمبر اے شہہ جن و بشر