baKHt mera jo mohabbat mein rasa ho jae

baḳht merā jo mohabbat meñ rasā ho jaa.e

merī taqdīr madīne kī fazā ho jaa.e

kaash maqbūl mire dil kī duā ho jaa.e

ek sajda dar-e-maulā pe adā ho jaa.e

us kī tāzīm ko uThte haiñ salātīn-e-jahāñ

tire kūche se jo mansūb gadā ho jaa.e

le bhī aa zulf-e-payambar kī mahak der na kar

ai sabā mujh pe ye ehsān zarā ho jaa.e

us ko apnī hī ḳhabar ho na do-ālam kā ḳhayāl

jo bhī dīvāna mahbūb-e-ḳhudā ho jaa.e

maiñ madīne kī ziyārat se bahut ḳhush huuñ magar

chāhtā huuñ ki ye maskan hī mirā ho jaa.e

un ke dāman ko mire haath kisī din chhū leñ

kuchh na kuchh haqq-e-aqīdat to adā ho jaa.e

ab bulā lo ki mujhe dam kā bharosa na rahā

nahīñ ma.alūm kisī vaqt bhī kyā ho jaa.e

mere nazdīk muqaddar kā dhanī hai vo 'nasīr'

jis ko un kī nazar-e-lutf-o-atā ho jaa.e

baKHt mera jo mohabbat mein rasa ho jae

meri taqdir madine ki faza ho jae

kash maqbul mere dil ki dua ho jae

ek sajda dar-e-maula pe ada ho jae

us ki tazim ko uThte hain salatin-e-jahan

tere kuche se jo mansub gada ho jae

le bhi aa zulf-e-payambar ki mahak der na kar

ai saba mujh pe ye ehsan zara ho jae

us ko apni hi KHabar ho na do-alam ka KHayal

jo bhi diwana mahbub-e-KHuda ho jae

main madine ki ziyarat se bahut KHush hun magar

chahta hun ki ye maskan hi mera ho jae

un ke daman ko mere hath kisi din chhu len

kuchh na kuchh haqq-e-aqidat to ada ho jae

ab bula lo ki mujhe dam ka bharosa na raha

nahin malum kisi waqt bhi kya ho jae

mere nazdik muqaddar ka dhani hai wo 'nasir'

jis ko un ki nazar-e-lutf-o-ata ho jae