dar-e-mahbub par sajda agar ek bar ho jae

dar-e-mahbūb par sajda agar ik baar ho jaa.e

dil-e-pur-ārzū sar-chashma-e-anvār ho jaa.e

tajallī aam ho aur vā dar-e-asrār ho jaa.e

jabīn-e-dil jo naqsh-e-āstān-e-yār ho jaa.e

kamāl-e-zabt kī ḳhātir gavārā hī nahīñ mujh ko

ki harf-e-ārzū sharminda-e-iz.hār ho jaa.e

mirī kashtī hai maiñ huuñ aur girdāb-e-mohabbat hai

jo vo ho nā-ḳhudā merā to beḌā paar ho jaa.e

zahe shān-e-barāhīmī ki namrūdoñ kī duniyā meñ

vo jis ātish ko bhī kah de vahī gulzār ho jaa.e

jo vo chāhe to mujh ko ik nazar se zindagī baḳhshe

jo vo chāhe to baḳht-e-ḳhufta bhī bedār ho jaa.e

karam us kā hai ye yā mo.ajiza mere tasavvur kā

jahāñ kar luuñ maiñ band āñkheñ vahīñ dīdār ho jaa.e

tire piine ko roz aaya karegī arsh-e-a.azam se

mai-e-ishq-e-mohammad se jo tū sarshār ho jaa.e

dar-e-mahbub par sajda agar ek bar ho jae

dil-e-pur-arzu sar-chashma-e-anwar ho jae

tajalli aam ho aur wa dar-e-asrar ho jae

jabin-e-dil jo naqsh-e-astan-e-yar ho jae

kamal-e-zabt ki KHatir gawara hi nahin mujh ko

ki harf-e-arzu sharminda-e-izhaar ho jae

meri kashti hai main hun aur girdab-e-mohabbat hai

jo wo ho na-KHuda mera to beDa par ho jae

zahe shan-e-barahimi ki namrudon ki duniya mein

wo jis aatish ko bhi kah de wahi gulzar ho jae

jo wo chahe to mujh ko ek nazar se zindagi baKHshe

jo wo chahe to baKHt-e-KHufta bhi bedar ho jae

karam us ka hai ye ya moajiza mere tasawwur ka

jahan kar lun main band aankhen wahin didar ho jae

tere pine ko roz aaya karegi arsh-e-azam se

mai-e-ishq-e-mohammad se jo tu sarshaar ho jae