dekha hai jis ne ru-e-daraKHshan huzur ka

dekhā hai jis ne rū-e-daraḳhshāñ huzūr kā

dīvāna ho gayā hai vo insāñ huzūr kā

bistar niyāz-e-'ishq hai malbūs lā-ilāh

kis darja hai 'azīm ye sāmāñ huzūr kā

us ke dayār-e-dil kī nigahbāñ haiñ rahmateñ

ābād jis ke dil meñ hai armāñ huzūr kā

mil jā.egā huzūr se parvāna-e-najāt

dast-e-talab se thaam le dāmāñ huzūr kā

kyūñkar na kufr-sāz siyāsat ho sharmsār

īmā-e-kārsāz hai īmāñ huzūr kā

islām kā nafāz hai kaif-e-bahār-e-zīst

islām sar-basar hai gulistāñ huzūr kā

ek ek baat kāshif-e-rāz-e-najāt hai

ek ek harf ḳhuld-badāmāñ huzūr kā

insāniyat-navāz hai qānūn-e-lā-ilāh

dastūr-e-sad-nashāt hai qur.āñ huzūr kā

insāñ ko dī hai azmat-e-insāñ kī tarbiyat

kyā kam hai kā.enāt pe ehsāñ huzūr kā

jo nāmvar hai dahr meñ 'zauqī' ke naam se

lahore meñ hai ek sanā-ḳhvāñ huzūr kā

dekha hai jis ne ru-e-daraKHshan huzur ka

diwana ho gaya hai wo insan huzur ka

bistar niyaz-e-'ishq hai malbus la-ilah

kis darja hai 'azim ye saman huzur ka

us ke dayar-e-dil ki nigahban hain rahmaten

aabaad jis ke dil mein hai arman huzur ka

mil jaega huzur se parwana-e-najat

dast-e-talab se tham le daman huzur ka

kyunkar na kufr-saz siyasat ho sharmsar

ima-e-karsaz hai iman huzur ka

islam ka nafaz hai kaif-e-bahaar-e-zist

islam sar-basar hai gulistan huzur ka

ek ek baat kashif-e-raaz-e-najat hai

ek ek harf KHuld-badaman huzur ka

insaniyat-nawaz hai qanun-e-la-ilah

dastur-e-sad-nashat hai quran huzur ka

insan ko di hai azmat-e-insan ki tarbiyat

kya kam hai kaenat pe ehsan huzur ka

jo namwar hai dahr mein 'zauqi' ke nam se

lahore mein hai ek sana-KHwan huzur ka