dil-o-nigah ki duniya nai nai hui hai

dil-o-nigāh kī duniyā na.ī na.ī huī hai

darūd paḌhte hī ye kaisī raushnī huī hai

maiñ bas yūñhī to nahīñ aa gayā huuñ mahfil meñ

kahīñ se izn milā hai to hāzirī huī hai

jahān-e-kun se udhar kyā thā kaun jāntā hai

magar vo nuur ki jis se ye zindagī huī hai

hazār shukr ġhulāmān-e-shāh-e-bat.hā meñ

shurūa din se mirī hāzirī lagī huī hai

baham the dāman-e-rahmat se jab to chain se the

judā hue haiñ to ab jaan par banī huī hai

ye sar uThā.e jo maiñ jā rahā huuñ jānib-e-ḳhuld

mire liye mire aaqā ne baat kī huī hai

mujhe yaqīñ hai vo ā.eñge vaqt-e-āḳhir bhī

maiñ kah sakūñgā ziyārat abhī abhī huī hai

dil-o-nigah ki duniya nai nai hui hai

darud paDhte hi ye kaisi raushni hui hai

main bas yunhi to nahin aa gaya hun mahfil mein

kahin se izn mila hai to haziri hui hai

jahan-e-kun se udhar kya tha kaun jaanta hai

magar wo nur ki jis se ye zindagi hui hai

hazar shukr ghulaman-e-shah-e-batha mein

shurua din se meri haziri lagi hui hai

baham the daman-e-rahmat se jab to chain se the

juda hue hain to ab jaan par bani hui hai

ye sar uThae jo main ja raha hun jaanib-e-KHuld

mere liye mere aaqa ne baat ki hui hai

mujhe yaqin hai wo aaenge waqt-e-aKHir bhi

main kah sakunga ziyarat abhi abhi hui hai