ہاتھ میں دامان شاہ دو جہاں رکھتا ہوں میں

ہاتھ میں دامان شاہ دو جہاں رکھتا ہوں میں

اپنے قبضہ میں زمین و آسماں رکھتا ہوں میں

میں زباں کو صرف آہ و شور و شیون کیوں کروں

صرف ان کی نعت پڑھنے کو زباں رکھتا ہوں میں

میری کشتی چھوڑ دے بطحا کی جانب نا خدا

اپنے دل میں خوف طوفاں کا کہاں رکھتا ہوں میں

سرور کون و مکاں پر کیوں نہ صدقے جاؤں میں

ان کے صدقے میں لب گوہر فشاں رکھتا ہوں میں

مجھ کو تو مطلوب گلیاں ہیں دیار پاک کی

دور دل سے حسرت کون و مکاں رکھتا ہوں میں

یہ وہ دولت ہے کہ جس پر گنج قاروں بھی نثار

دل میں اپنے عشق احمد کو نہاں رکھتا ہوں میں

ورنہ اے بہزادؔ میں کیا کیا یہ میری شاعری

فیض ہے ان کا جو یہ نام و نشاں رکھتا ہوں میں