hath mein daman-e-shah-e-do-jahan rakhta hun main

haath meñ dāmān-e-shāh-e-do-jahāñ rakhtā huuñ maiñ

apne qabze meñ zamīn-o-āsmāñ rakhtā huuñ maiñ

maiñ zabāñ ko sarf-e-āh-o-shor-o-shevan kyoñ karūñ

sirf un kī naa't paḌhne ko zabāñ rakhtā huuñ maiñ

merī kashtī chhoḌ de bat.hā kī jānib nā-ḳhudā

apne dil meñ ḳhauf tūfāñ kā kahāñ rakhtā huuñ maiñ

sarvar-e-kaun-o-makāñ par kyuuñ na sadqe jā.ūñ maiñ

un ke sadqe meñ lab-e-gauhar-fashāñ rakhtā huuñ maiñ

mujh ko to matlūb galiyāñ haiñ dayār-e-pāk kī

duur dil se hasrat-e-kaun-o-makāñ rakhtā huuñ maiñ

ye vo daulat hai ki jis par ganj-e-qārūñ bhī nisār

dil meñ apne ‘ishq-e-ahmad ko nihāñ rakhtā huuñ maiñ

varna ai 'bahzād' maiñ kyā kyā ye merī shā'irī

faiz hai un kā jo ye nām-o-nishāñ rakhtā huuñ maiñ

hath mein daman-e-shah-e-do-jahan rakhta hun main

apne qabze mein zamin-o-asman rakhta hun main

main zaban ko sarf-e-ah-o-shor-o-shewan kyon karun

sirf un ki na't paDhne ko zaban rakhta hun main

meri kashti chhoD de batha ki jaanib na-KHuda

apne dil mein KHauf tufan ka kahan rakhta hun main

sarwar-e-kaun-o-makan par kyun na sadqe jaun main

un ke sadqe mein lab-e-gauhar-fashan rakhta hun main

mujh ko to matlub galiyan hain dayar-e-pak ki

dur dil se hasrat-e-kaun-o-makan rakhta hun main

ye wo daulat hai ki jis par ganj-e-qarun bhi nisar

dil mein apne ‘ishq-e-ahmad ko nihan rakhta hun main

warna ai 'bahzad' main kya kya ye meri sha'iri

faiz hai un ka jo ye nam-o-nishan rakhta hun main