ہو تم میں کوئی شاہ مدینہ تو دکھا دو

ہو تم میں کوئی شاہ مدینہ تو دکھا دو

یعنی مرے سرکار کے جیسا تو دکھا دو

اس چہرۂ انور کا بیاں بعد میں کرنا

پہلے مرے مختار سا تلوا تو دکھا دو

وہ زلف جسے حق نے دی والیل سے تعبیر

ہو رنگ کوئی ایسا بھی گہرا تو دکھا دو

اس شاہ کے جیسا کوئی دنیا میں شہنشاہ

جو ٹوٹی چٹائی پہ ہو بیٹھا تو دکھا دو

سدرہ سے پرے عرش الٰہی پہ اے لوگو

سرکار سے پہلے کوئی پہنچا تو دکھا دو

ہم نے تو کوئی دوسرا احمد نہیں دیکھا

ہو تم نے اگرچہ کوئی دیکھا تو دکھا دو

آئے تو بہت دنیا میں اسلام کے داعی

پر ایسا کوئی ایک ہی آیا تو دکھا دو

بن مانگے یہ بھر دیتے ہیں محتاجوں کے دامن

دیکھا ہو مرے آقا سا آقا تو دکھا دو

محشر میں جو اک ایک کی فرمائے شفاعت

ہو کوئی محمد کے علاوہ تو دکھا دو

دنیا میں کہیں اپنے غلاموں کے لئے نورؔ

پتھر جو شکم پہ کوئی باندھا تو دکھا دو