جس وقت مری روح مرے تن سے جدا ہو

جس وقت مری روح مرے تن سے جدا ہو

اس وقت مرے لب پہ صدا صل علیٰ ہو

سر میرا در شاہ مدینہ پہ جھکا ہو

اے کاش اسی وقت مقدر میں قضا ہو

ایماں کا تقاضا ہے محبت میں نبی کی

ہر فرد کفن باندھے ہوئے سر پہ کھڑا ہو

ناموس رسالت کے لیے جان لٹا دے

اللہ مسلمان کو وہ جذبہ عطا ہو

ہر شب یہ تمنا لیے سوتا ہوں میں آقا

اے کاش کبھی خواب میں دیدار عطا ہو

ہو خوف اسے گرمیٔ محشر کا بھلا کیوں

سرکار کے جو دامن رحمت میں چھپا ہو

کیوں بھیک وہ مانگے کسی دربار سے فیصلؔ

جو شاہ مدینہ کے گداؤں کا گدا ہو