kaunain mein yun jalwa-numa koi nahin hai

kaunain meñ yuuñ jalva-numā koī nahīñ hai

allāh ke baa'd un se baḌā koī nahīñ hai

yuuñ farsh se tā-arsh gayā koī nahīñ hai

me.arāj meñ is darja rasā koī nahīñ hai

māñgo to zarā un ke tavassut se kabhī kuchh

maqbūl na ho aisī duā koī nahīñ hai

kaam aa.ī sar-e-hashr mohammad kī shafā.at

sab kahte haiñ jā terī ḳhatā koī nahīñ hai

har-chand nabī īsā-o-mūsā bhī haiñ lekin

mahbūb-e-ḳhudā un ke sivā koī nahīñ

allāh ne sau husn diye nau-e-bashar ko

yuuñ nuur ke sāñche meñ Dhalā koī nahīñ hai

dil un kā hai is dil meñ vahī jalva-fagan haiñ

ab un ke alāva ba-ḳhudā koī nahīñ hai

ummat meñ huuñ un kī ki jo haiñ rahmat-e-ālam

kyoñ hashr kā Dar ho mirā kyā koī nahīñ hai

is daur pe ai ḳhatm-e-rusul chashm-e-karam ho

rahzan haiñ bahut rāh-numā koī nahīñ hai

paḌhte raho din-rāt 'nasīr' un kā vazīfa

aisā amal-e-radd-e-balā koī nahīñ hai

kaunain mein yun jalwa-numa koi nahin hai

allah ke ba'd un se baDa koi nahin hai

yun farsh se ta-arsh gaya koi nahin hai

mearaj mein is darja rasa koi nahin hai

mango to zara un ke tawassut se kabhi kuchh

maqbul na ho aisi dua koi nahin hai

kaam aai sar-e-hashr mohammad ki shafaat

sab kahte hain ja teri KHata koi nahin hai

har-chand nabi isa-o-musa bhi hain lekin

mahbub-e-KHuda un ke siwa koi nahin

allah ne sau husn diye nau-e-bashar ko

yun nur ke sanche mein Dhala koi nahin hai

dil un ka hai is dil mein wahi jalwa-fagan hain

ab un ke alawa ba-KHuda koi nahin hai

ummat mein hun un ki ki jo hain rahmat-e-alam

kyon hashr ka Dar ho mera kya koi nahin hai

is daur pe ai KHatm-e-rusul chashm-e-karam ho

rahzan hain bahut rah-numa koi nahin hai

paDhte raho din-raat 'nasir' un ka wazifa

aisa amal-e-radd-e-bala koi nahin hai