خدایا نئی زندگی چاہتا ہوں

خدایا نئی زندگی چاہتا ہوں

فقط دل میں حب نبی چاہتا ہوں

مرے دل میں رہنے دے عشق محمد

میں اے چارہ گر کب کمی چاہتا ہوں

مدینے کی گلیاں ہوں اور میرا سر ہو

میں اپنے میں یہ بے خودی چاہتا ہوں

ہر اک ذرہ جن پر کہے یا محمد

وہ جلوؤں کی تابندگی چاہتا ہوں

محمد ہو یا مصطفیٰ ہو کہ احمد

ہر اک لفظ پر بے خودی چاہتا ہوں

گزر جائے جو صرف یاد نبی میں

میں حق سے وہی زندگی چاہتا ہوں

ہو نام محمد سے آغاز جس کا

میں بہزادؔ وہ شاعری چاہتا ہوں