لب پر مرے جو ذکر شہ نامدار ہے

لب پر مرے جو ذکر شہ نامدار ہے

صل علی کی بزم میں ہر سو پکار ہے

یوں جو تجلیوں سے فضا زرنگار ہے

شاید نزول رحمت پروردگار ہے

میری زباں پہ نام محمد جب آ گیا

کیسے کہوں کہ دل پہ مجھے اختیار ہے

پیہم جو اٹھ رہا ہے مدینے کی یاد میں

میرے لیے وہ درد بہت خوشگوار ہے

فیضان گریۂ غم دوری نہ پوچھئے

اشکوں سے دھل رہا ہے جو دل کا غبار ہے

ادنیٰ سا ربط ذات محمد سے ہو جسے

وہ دل ہے خوش نصیب وہ غم سازگار ہے

اب دل ہے مضطرب غم دوری لیے ہوئے

اب رات کو ہے چین نہ دن کو قرار ہے

جس میں ہو بوئے عشق محمد بسی ہوئی

صد رشک گلستاں وہ دل داغدار ہے

خود کو نثار سرور کونین کر بھی دے

کیا تجھ کو اور جان حزیںؔ انتظار ہے