مرا مدعا ہیں مدینے کی راہیں

مرا مدعا ہیں مدینے کی راہیں

مرا آسرا ہیں مدینے کی راہیں

پہنچ جانا منزل پہ مشکل نہیں ہے

کہ خود رہنما ہیں مدینے کی راہیں

مری مشکلیں مشکلیں کب رہی ہیں

کہ مشکل کشا ہیں مدینے کی راہیں

انہیں سے پہنچ جاؤں گا میں خدا تک

کہ راہ خدا ہیں مدینے کی راہیں

نہ آنکھوں سے ہیں دور حسن تصور

نہ دل سے جدا ہیں مدینے کی راہیں

ہر اک ذرے میں سو گلستاں چھپے ہیں

عجب پر فضا ہیں مدینے کی راہیں

مجھے کھینچے لیتی ہیں بہزادؔ مضطر

نہ پوچھو کہ کیا ہیں مدینے کی راہیں