محمد پہ جو دل فدا کر رہا ہے

محمد پہ جو دل فدا کر رہا ہے

وہی زیست کا حق ادا کر رہا ہے

الٰہی مدینے میں پہونچا دے ہم کو

یہی قلب مضطر دعا کر رہا ہے

یہ مہر و کواکب یہ ذرے یہ غنچے

جو ہے آپ ہی کی ثنا کر رہا ہے

ارے دل برابر رٹے جا محمد

نماز محبت قضا کر رہا ہے

بچاتا ہے کشتی کو طوفاں کی زد سے

ارے ناخدا تو یہ کیا کر رہا ہے

مجھے خوف طوفاں کا کوئی نہیں ہے

جو کچھ کر رہا ہے خدا کر رہا ہے

میں بہزادؔ بیٹھا ہوں پھیلائے دامن

عطا کرنے والا عطا کر رہا ہے