mohammad pe jo dil fida kar raha hai

mohammad pe jo dil fidā kar rahā hai

vahī ziist kā haq adā kar rahā hai

ilāhī madīne meñ pahūñchā de ham ko

yahī qalb-e-muztar duā kar rahā hai

ye mehr-o-kavākib ye zarre ye ġhunche

jo hai aap hī kī sanā kar rahā hai

are dil barābar raTe jā mohammad

namāz-e-mohabbat qazā kar rahā hai

bachātā hai kashtī ko tūfāñ kī zad se

are nāḳhudā tū ye kyā kar rahā hai

mujhe ḳhauf tūfāñ kā koī nahīñ hai

jo kuchh kar rahā hai ḳhudā kar rahā hai

maiñ 'bahzād' baiThā huuñ phailā.e dāman

atā karne vaalā atā kar rahā hai

mohammad pe jo dil fida kar raha hai

wahi zist ka haq ada kar raha hai

ilahi madine mein pahuncha de hum ko

yahi qalb-e-muztar dua kar raha hai

ye mehr-o-kawakib ye zarre ye ghunche

jo hai aap hi ki sana kar raha hai

are dil barabar raTe ja mohammad

namaz-e-mohabbat qaza kar raha hai

bachata hai kashti ko tufan ki zad se

are naKHuda tu ye kya kar raha hai

mujhe KHauf tufan ka koi nahin hai

jo kuchh kar raha hai KHuda kar raha hai

main 'bahzad' baiTha hun phailae daman

ata karne wala ata kar raha hai