naKHuda wo apni kashti ka agar ho jaega

nāḳhudā vo apnī kashtī kā agar ho jā.egā

tai ba-āsānī mohabbat kā safar ho jā.egā

dil se jo bhī pairav-e-ḳhairul-bashar ho jā.egā

vo zamīn-o-āsmāñ kā tāj-e-sar ho jā.egā

jalva-e-ahmad kā nazzāra agar ho jā.egā

dekhne vaalā 'azīz-e-har-nazar ho jā.egā

fikr-e-manzil dūrī-e-sāhil bhī koī chiiz hai

paar hai beḌā ishāra bhī agar ho jā.egā

dil meñ un kī yaad lab par zikr un kā sub.h-o-shām

ḳhud-baḳhud paidā du'āoñ meñ asar ho jā.egā

ḳhāk-e-taiba ko banā legā jo surma aañkh kā

vo yaqīnan is chaman kā dīda-var ho jā.egā

baaġh ban jā.eñge sahrā ḳhaak ban jā.eñge phuul

ik ishāra chashm-e-ahmad kā jidhar ho jā.egā

zarra-zarra dil kā ban jā.egā rashk-e-āftāb

partav-e-husn-e-nabī jab jalva-gar ho jā.egā

āsmāñ vaale jhukeñge us kī 'izzat ke liye

banda-e-dargāh-e-ahmad jo bashar ho jā.egā

fikr-e-marham kyoñ kareñ ham chāra-e-ġham kyoñ kareñ

hāl-e-dil kā aa.ina zaḳhm-e-jigar ho jā.egā

ham madīne meñ hoñ 'mahvī' un kā rauza sāmne

ḳhud-baḳhud phir qissa-e-ġham muḳhtasar ho jā.egā

naKHuda wo apni kashti ka agar ho jaega

tai ba-asani mohabbat ka safar ho jaega

dil se jo bhi pairaw-e-KHairul-bashar ho jaega

wo zamin-o-asman ka taj-e-sar ho jaega

jalwa-e-ahmad ka nazzara agar ho jaega

dekhne wala 'aziz-e-har-nazar ho jaega

fikr-e-manzil duri-e-sahil bhi koi chiz hai

par hai beDa ishaara bhi agar ho jaega

dil mein un ki yaad lab par zikr un ka subh-o-sham

KHud-baKHud paida du'aon mein asar ho jaega

KHak-e-taiba ko bana lega jo surma aankh ka

wo yaqinan is chaman ka dida-war ho jaega

bagh ban jaenge sahra KHak ban jaenge phul

ek ishaara chashm-e-ahmad ka jidhar ho jaega

zarra-zarra dil ka ban jaega rashk-e-aftab

partaw-e-husn-e-nabi jab jalwa-gar ho jaega

aasman wale jhukenge us ki 'izzat ke liye

banda-e-dargah-e-ahmad jo bashar ho jaega

fikr-e-marham kyon karen hum chaara-e-gham kyon karen

haal-e-dil ka aaina zaKHm-e-jigar ho jaega

hum madine mein hon 'mahwi' un ka rauza samne

KHud-baKHud phir qissa-e-gham muKHtasar ho jaega