nigah-e-lutf ke umid-war hum bhi hain

nigāh-e-lutf ke ummīd-vār ham bhī haiñ

liye hue ye dil-e-be-qarār ham bhī haiñ

hamāre dast-e-tamannā kī laaj bhī rakhnā

tire faqīroñ meñ ai shahryār ham bhī haiñ

idhar bhī tausan-e-aqdas ke do qadam jalve

tumhārī raah meñ musht-e-ġhubār ham bhī haiñ

khilā do ġhuncha-e-dil sadqa bād-e-dāman kā

umīd-vār-e-nasīm-e-bahār ham bhī haiñ

tumhārī ek nigāh-e-karam meñ sab kuchh hai

paḌe hue to sar-e-rahguzār ham bhī haiñ

jo sar pe rakhne ko mil jaa.e nā’l-e-pāk-e-huzūr

to phir kaheñge ki haañ tājdār ham bhī haiñ

ye kis shahanshah-e-‘ālī kā sadqa baTtā hai

ki ḳhusruoñ meñ paḌī hai pukār ham bhī haiñ

hamārī bigḌī banī un ke iḳhtiyār meñ hai

sipurd unheñ kiye sab kārobār ham bhī haiñ

'hasan' hai jis kī saḳhāvat kī dhuum 'ālam meñ

unhīñ ke tum bhī ho ik reza ḳhvār ham bhī haiñ

nigah-e-lutf ke ummid-war hum bhi hain

liye hue ye dil-e-be-qarar hum bhi hain

hamare dast-e-tamanna ki laj bhi rakhna

tere faqiron mein ai shahryar hum bhi hain

idhar bhi tausan-e-aqdas ke do qadam jalwe

tumhaari rah mein musht-e-ghubar hum bhi hain

khila do ghuncha-e-dil sadqa baad-e-daman ka

umid-war-e-nasim-e-bahaar hum bhi hain

tumhaari ek nigah-e-karam mein sab kuchh hai

paDe hue to sar-e-rahguzar hum bhi hain

jo sar pe rakhne ko mil jae na’l-e-pak-e-huzur

to phir kahenge ki han tajdar hum bhi hain

ye kis shahanshah-e-‘ali ka sadqa baTta hai

ki KHusruon mein paDi hai pukar hum bhi hain

hamari bigDi bani un ke iKHtiyar mein hai

sipurd unhen kiye sab karobar hum bhi hain

'hasan' hai jis ki saKHawat ki dhum 'alam mein

unhin ke tum bhi ho ek reza KHwar hum bhi hain