قدم زمیں پہ فلک پر قیام ہوتا ہے

قدم زمیں پہ فلک پر قیام ہوتا ہے

کہ نعت خوانوں کا کچھ ایسا نام ہوتا ہے

فرشتے یوں ہی نہیں محفلوں میں آتے ہیں

درود پڑھنے سے یہ اہتمام ہوتا ہے

کچھ ایسا لگتا ہے جنت میں گھوم پھر رہے ہیں

مدینہ پاک میں وہ انتظام ہوتا ہے

یہاں پہ اشک ندامت چراغ بنتے ہیں

یہاں سکوت سپرد کلام ہوتا ہے

یہ کائنات توازن شعار یوں ہی نہیں

ہر اعتدال پہ آقا کا نام ہوتا ہے

کسی کسی کو ہے ملتا صراط حب رسول

خدائے پاک کا اپنا نظام ہوتا ہے