rang naya hai bu nai aalam-e-nau-bahaar mein

rang nayā hai bū na.ī 'ālam-e-nau-bahār meñ

utrā hai kārvān-e-gul ziist ke lāla-zār meñ

sar-ba-sujūd haiñ malak salle-'alā kā shor hai

āmad-e-mustafā kī dhuum aaj hai rozgār meñ

nik.hat-e-ḳhuld le ke aaj bāġh-e-jahāñ meñ khil uThā

phuul jo sab se thā hasīñ gulshan-e-kirdgār meñ

chāheñ qamar ko shaq kareñ chāheñ palaT deñ āftāb

kaun hai aisā mo'jiza jo nahīñ iḳhtiyār meñ

us kī najāt ho ga.ī bigḌe nasīb ban ga.e

dīn-e-nabī ke aa gayā koī agar hisār meñ

jis jagah paḌ ga.e qadam zarre chamak chamak uThe

kāhkashāñ sī bichh ga.ī sahrā meñ regzār meñ

mad.h-e-rasūl ke liye kam hai hayāt-e-ḳhizr bhī

rok lo ab qalam 'nafīs' lutf hai iḳhtisār meñ

rang naya hai bu nai 'alam-e-nau-bahaar mein

utra hai karwan-e-gul zist ke lala-zar mein

sar-ba-sujud hain malak salle-'ala ka shor hai

aamad-e-mustafa ki dhum aaj hai rozgar mein

nikhat-e-KHuld le ke aaj bagh-e-jahan mein khil uTha

phul jo sab se tha hasin gulshan-e-kirdgar mein

chahen qamar ko shaq karen chahen palaT den aaftab

kaun hai aisa mo'jiza jo nahin iKHtiyar mein

us ki najat ho gai bigDe nasib ban gae

din-e-nabi ke aa gaya koi agar hisar mein

jis jagah paD gae qadam zarre chamak chamak uThe

kahkashan si bichh gai sahra mein regzar mein

madh-e-rasul ke liye kam hai hayat-e-KHizr bhi

rok lo ab qalam 'nafis' lutf hai iKHtisar mein