رنگ نیا ہے بو نئی عالم نو بہار میں

رنگ نیا ہے بو نئی عالم نو بہار میں

اترا ہے کاروان گل زیست کے لالہ زار میں

سر بہ سجود ہیں ملک صل علیٰ کا شور ہے

آمد مصطفیٰ کی دھوم آج ہے روزگار میں

نکہت خلد لے کے آج باغ جہاں میں کھل اٹھا

پھول جو سب سے تھا حسیں گلشن کردگار میں

چاہیں قمر کو شق کریں چاہیں پلٹ دیں آفتاب

کون ہے ایسا معجزہ جو نہیں اختیار میں

اس کی نجات ہو گئی بگڑے نصیب بن گئے

دین نبیؐ کے آ گیا کوئی اگر حصار میں

جس جگہ پڑ گئے قدم ذرے چمک چمک اٹھے

کاہکشاں سی بچھ گئی صحرا میں ریگزار میں

مدح رسول کے لئے کم ہے حیات خضر بھی

روک لو اب قلم نفیسؔ لطف ہے اختصار میں