rasul-e-mursalan tum ho nabi-ul-ambiya tum ho

rasūl-e-mursalāñ tum ho nabī-ul-ambiyā tum ho

ḳhudā ke baa'd jis kī zaat hai yā-mustafā tum ho

nigāh-e-ahl-e-bīnish kah rahī hai bā-safā tum ho

ḳhudā ko jis meñ banda dekh le vo aa.inā tum ho

haqīqat to ḳhudā par āshkārā hai ki kyā tum ho

sharī'at kahtī hai bā'd-az-ḳhudā yā-mustafā tum ho

ḳhudā.ī-bhar kī saarī ḳhūbiyāñ tum se numāyāñ haiñ

ḳhudā kahtā nahīñ haañ maz.har-e-shān-e-ḳhudā tum ho

tumhārā vasf insāñ kī zabāñ kar hī nahīñ saktī

habīb-e-kibriyā tum ho shah-e-har-do-sarā tum ho

na rahbar se hameñ matlab na gumrāhī kā andesha

hamārī manzil-e-maqsad hamāre rahnumā tum ho

tumhāre 'aḳhtar'-e-bīmār kā shāhā ye īmāñ hai

du'ā tum ho davā tum ho sukūñ tum ho shifā tum ho

rasul-e-mursalan tum ho nabi-ul-ambiya tum ho

KHuda ke ba'd jis ki zat hai ya-mustafa tum ho

nigah-e-ahl-e-binish kah rahi hai ba-safa tum ho

KHuda ko jis mein banda dekh le wo aaina tum ho

haqiqat to KHuda par aashkara hai ki kya tum ho

shari'at kahti hai ba'd-az-KHuda ya-mustafa tum ho

KHudai-bhar ki sari KHubiyan tum se numayan hain

KHuda kahta nahin han mazhar-e-shan-e-KHuda tum ho

tumhaara wasf insan ki zaban kar hi nahin sakti

habib-e-kibriya tum ho shah-e-har-do-sara tum ho

na rahbar se hamein matlab na gumrahi ka andesha

hamari manzil-e-maqsad hamare rahnuma tum ho

tumhaare 'aKHtar'-e-bimar ka shaha ye iman hai

du'a tum ho dawa tum ho sukun tum ho shifa tum ho