raushan hamara dil hai mohammad ke nur se

raushan hamārā dil hai mohammad ke nuur se

laa.e haiñ is charāġh ko ham koh-e-tūr se

muusā ne us ko tuur pe dekhā thā duur se

raushan huī hai sham-e-haram jis ke nuur se

ḳhalvat ho aisī jis meñ farishte na sun sakeñ

ik dil kī baat arz karūñgā huzūr se

us ke karam ne khīñch liyā jāliyoñ ke paas

Dartā thā maiñ salām paḌhā maiñ ne duur se

jab tak nabī kī yaad na dil meñ samā.egī

ḳhālī na hogā dil mirā kibr-o-ġhurūr se

dīdār ho ḳhudā kā ziyārat rasūl kī

firdaus se ġharaz hai na matlab hai huur se

merī nazar ḳhatā na karegī yaqīn hai

pahchān lūñgā hashr meñ hazrat ko duur se

ishq-e-nabī se nashsha-e-irfāñ meñ chuur huuñ

dhoyā hai maiñ ne dil ko sharāb-e-tahūr se

ā.eñge aap dil meñ ye va.ada to kījiye

maiñ ka.aba maañg lūñgā ḳhudā-e-ġhafūr se

rūhul-qudus se ruuh ne paayā hai merī faiz

sīkhī hai na.at-goī baḌe zī-shu.ūr se

taḌpūñgā maiñ firāq-e-nabī meñ tamām umr

ye va.ada le liyā hai dil-e-nā-subūr se

rutbe ko mustafā ke malā.ik se pūchhiye

sajde kā hukm pahle milā hai zuhūr se

'beḳhud' ko jām-e-bāda-e-kausar ho vo atā

jannat meñ jhūmtā rahe jis ke surūr se

raushan hamara dil hai mohammad ke nur se

lae hain is charagh ko hum koh-e-tur se

musa ne us ko tur pe dekha tha dur se

raushan hui hai sham-e-haram jis ke nur se

KHalwat ho aisi jis mein farishte na sun saken

ek dil ki baat arz karunga huzur se

us ke karam ne khinch liya jaliyon ke pas

Darta tha main salam paDha main ne dur se

jab tak nabi ki yaad na dil mein samaegi

KHali na hoga dil mera kibr-o-ghurur se

didar ho KHuda ka ziyarat rasul ki

firdaus se gharaz hai na matlab hai hur se

meri nazar KHata na karegi yaqin hai

pahchan lunga hashr mein hazrat ko dur se

ishq-e-nabi se nashsha-e-irfan mein chur hun

dhoya hai main ne dil ko sharab-e-tahur se

aaenge aap dil mein ye wada to kijiye

main kaba mang lunga KHuda-e-ghafur se

ruhul-qudus se ruh ne paya hai meri faiz

sikhi hai nat-goi baDe zi-shuur se

taDpunga main firaq-e-nabi mein tamam umr

ye wada le liya hai dil-e-na-subur se

rutbe ko mustafa ke malaik se puchhiye

sajde ka hukm pahle mila hai zuhur se

'beKHud' ko jam-e-baada-e-kausar ho wo ata

jannat mein jhumta rahe jis ke surur se