samne jis ki nigahon ke madina aaya

sāmne jis kī nigāhoñ ke madīna aaya

lutf ke saath use marnā use jiinā aaya

tābish-e-husn-e-mohammad thī ye me.arāj kī raat

har chamakte hue taare ko pasīna aaya

zindagī vādī-e-yasrib meñ basar karnā thī

hazrat-e-ḳhizr ko jī kar bhī na jiinā aaya

apnī gardish pe isī vajah se nāzāñ hai falak

ki tavāf-e-dar-e-aqdas kā qarīna aaya

baiThe us shān-o-hasham se vo sar-e-zīn-e-burāq

samjhe jibrīl ki ḳhātam meñ nagīna aaya

hauz-e-kausar ke qarīñ mālik-e-kausar kī qasam

vo hai kāfir jo kahe mujh ko na piinā aaya

nāḳhudā jab ho mohammad sā to ham kyoñ na kaheñ

'nūh' tūfān-e-havādis meñ safīnā aaya

samne jis ki nigahon ke madina aaya

lutf ke sath use marna use jina aaya

tabish-e-husn-e-mohammad thi ye mearaj ki raat

har chamakte hue tare ko pasina aaya

zindagi wadi-e-yasrib mein basar karna thi

hazrat-e-KHizr ko ji kar bhi na jina aaya

apni gardish pe isi wajah se nazan hai falak

ki tawaf-e-dar-e-aqdas ka qarina aaya

baiThe us shan-o-hasham se wo sar-e-zin-e-buraq

samjhe jibril ki KHatam mein nagina aaya

hauz-e-kausar ke qarin malik-e-kausar ki qasam

wo hai kafir jo kahe mujh ko na pina aaya

naKHuda jab ho mohammad sa to hum kyon na kahen

'nuh' tufan-e-hawadis mein safina aaya