saya hai mere ghar pe na chhappar mere huzur

saaya hai mere ghar pe na chhappar mire huzūr

jhulsā rahā hai dhuup kā lashkar mire huzūr

patta shajar pe hai na gul-e-tar mire huzūr

shabnam hai āftāb kī zad par mire huzūr

shamsuzzuhā kī raushnī dekhe ki koī ab

badruddujā kā dūdhiyā manzar mire huzūr

rahmat hai har jahāñ ke liye aap kā vujūd

ā.īna mislukum kā hai shashdar mire huzūr

qur.ān kah rahā hai ki maktab kā aap ke

zarra hai āftāb se baḌh kar mire huzūr

ḳhalvat ho kunj-e-dil kī ki jannat nigāh kī

andar mire huzūr haiñ bāhar mire huzūr

allāh ke habīb kā allāh ke sivā

kis par tamām khultā hai jauhar mire huzūr

farsh-e-zamīñ pe āḳhirī allāh ke rasūl

'arsh-e-barīñ pe avval-o-anvar mere huzūr

kashtī se kāñptā hai ġhulāmoñ kī aaj bhī

har jahl-e-gumrahī kā samundar mire huzūr

bahr-e-ilah meñ itnā hasīñ itnā qīmtī

juz aap ke nahīñ koī gauhar mire huzūr

'vasfī' ḳhudā-gavāh ki merī nigāh meñ

qatra hai kā.enāt samundar mire huzūr

saya hai mere ghar pe na chhappar mere huzur

jhulsa raha hai dhup ka lashkar mere huzur

patta shajar pe hai na gul-e-tar mere huzur

shabnam hai aaftab ki zad par mere huzur

shamsuzzuha ki raushni dekhe ki koi ab

badrudduja ka dudhiya manzar mere huzur

rahmat hai har jahan ke liye aap ka wujud

aaina mislukum ka hai shashdar mere huzur

quran kah raha hai ki maktab ka aap ke

zarra hai aaftab se baDh kar mere huzur

KHalwat ho kunj-e-dil ki ki jannat nigah ki

andar mere huzur hain bahar mere huzur

allah ke habib ka allah ke siwa

kis par tamam khulta hai jauhar mere huzur

farsh-e-zamin pe aaKHiri allah ke rasul

'arsh-e-barin pe awwal-o-anwar mere huzur

kashti se kanpta hai ghulamon ki aaj bhi

har jahl-e-gumrahi ka samundar mere huzur

bahr-e-ilah mein itna hasin itna qimti

juz aap ke nahin koi gauhar mere huzur

'wasfi' KHuda-gawah ki meri nigah mein

qatra hai kaenat samundar mere huzur