saba har gul ki peshani pe ye paigham likh dena

sabā har gul kī peshānī pe ye paiġhām likh denā

mahaktī ḳhushbuoñ se mustafā kā naam likh denā

agar likhnā tavāf-e-kā'ba-e-aqdas muqaddar meñ

to mere naam taiba kī sunahrī shaam likh denā

azal se apne lab par tishnagī maiñ ne sajā.ī hai

mire hisse meñ kausar kā chhalaktā jaam likh denā

nabī ke dar ke zarre ko jamāl-e-kahkashāñ likhnā

to ḳhār-e-kūcha-e-taiba ko bhī gulfām likh denā

sadā palkoñ se maiñ apnī buhārūñ rauza-e-at.har

ḳhudāvandā mirī qismat meñ ye in'ām likh denā

qazā ke baa'd bhī ho sūrat-e-sarkār āñkhoñ meñ

ye tohfa āḳhirat kā bhī hamāre naam likh denā

agar hachkole khaa.e kashtī-e-hastī ‘shamīm-anjum’

to kashtī par imām-ul-ambiyā kā naam likh denā

saba har gul ki peshani pe ye paigham likh dena

mahakti KHushbuon se mustafa ka nam likh dena

agar likhna tawaf-e-ka'ba-e-aqdas muqaddar mein

to mere nam taiba ki sunahri sham likh dena

azal se apne lab par tishnagi main ne sajai hai

mere hisse mein kausar ka chhalakta jam likh dena

nabi ke dar ke zarre ko jamal-e-kahkashan likhna

to KHar-e-kucha-e-taiba ko bhi gulfam likh dena

sada palkon se main apni buhaarun rauza-e-athar

KHudawanda meri qismat mein ye in'am likh dena

qaza ke ba'd bhi ho surat-e-sarkar aankhon mein

ye tohfa aaKHirat ka bhi hamare nam likh dena

agar hachkole khae kashti-e-hasti ‘shamim-anjum’

to kashti par imam-ul-ambiya ka nam likh dena