sunte hain ki mahshar mein sirf unki rasai hai

sunte haiñ ki mahshar meñ sirf un kī rasā.ī hai

gar un kī rasā.ī hai lo jab to ban aa.ī hai

machlā hai ki rahmat ne ummīd bañdhā.ī hai

kyā baat tirī mujrim kyā baat banā.ī hai

sab ne saf-e-mehshar meñ lalkār diyā ham ko

ai bekasoñ ke aaqā ab terī duhā.ī hai

yuuñ to sab unhīñ kā hai par dil kī agar pūchho

ye TuuTe hue dil hī ḳhaas un kī kamā.ī hai

girte huoñ ko muzhda sajde meñ gire maulā

ro ro ke shafā'at kī tamhīd uThā.ī hai

ai dil ye sulagnā kyā jalnā hai to jal bhī uTh

dam ghuTne lagā zālim kyā dhūnī ramā.ī hai

ai 'ishq tire sadqe jalne se chhuTe saste

jo aag bujhā degī vo aag lagā.ī hai

hirs-o-havas-e-bad se dil tū bhī sitam kar le

tū hī nahīñ begāna duniyā hī parā.ī hai

taiba na sahī afzal makka hī baḌā zāhid

ham 'ishq ke bande haiñ kyoñ baat baḌhā.ī hai

matla' meñ ye shak kyā thā vallāh 'razā' vallāh

sirf un kī rasā.ī hai sirf un kī rasā.ī hai

sunte hain ki mahshar mein sirf un ki rasai hai

gar un ki rasai hai lo jab to ban aai hai

machla hai ki rahmat ne ummid bandhai hai

kya baat teri mujrim kya baat banai hai

sab ne saf-e-mehshar mein lalkar diya hum ko

ai bekason ke aaqa ab teri duhai hai

yun to sab unhin ka hai par dil ki agar puchho

ye TuTe hue dil hi KHas un ki kamai hai

girte huon ko muzhda sajde mein gire maula

ro ro ke shafa'at ki tamhid uThai hai

ai dil ye sulagna kya jalna hai to jal bhi uTh

dam ghuTne laga zalim kya dhuni ramai hai

ai 'ishq tere sadqe jalne se chhuTe saste

jo aag bujha degi wo aag lagai hai

hirs-o-hawas-e-bad se dil tu bhi sitam kar le

tu hi nahin begana duniya hi parai hai

taiba na sahi afzal makka hi baDa zahid

hum 'ishq ke bande hain kyon baat baDhai hai

matla' mein ye shak kya tha wallah 'raza' wallah

sirf un ki rasai hai sirf un ki rasai hai