tasawwuraat mein anwar dekhne wale

tasavvurāt meñ anvār dekhne vaale

haiñ jald rauza-e-sarkār dekhne vaale

tire nisār tahī-dāmanoñ meñ ham bhī haiñ

idhar bhī chashm-e-guhar-bār dekhne vaale

kabhī na uljhegī mujh se ye gardish-e-ayyām

mujhe haiñ ahmad-e-muḳhtār dekhne vaale

sivā.e dīd-e-madīna 'ilāj nā-mumkin

ye jaan leñ mujhe bīmār dekhne vaale

nasīb se mujhe ye ġham mile haiñ ranj na kar

mujhe ġhamoñ meñ giraftār dekhne vaale

surūr-e-bāda-e-hubb-e-nabī se be-ḳhud huuñ

mirī nigāhoñ se hushiyār dekhne vaale

vafūr-e-'ishq hī samjheñge merī nā’toñ ko

nigāh-e-fan se qalam-kār dekhne vaale

ba-faiz-e-sāhib-e-me'rāj 'ishq meñ 'aḳhtar'

ham āsmāñ ke haiñ us paar dekhne vaale

tasawwuraat mein anwar dekhne wale

hain jald rauza-e-sarkar dekhne wale

tere nisar tahi-damanon mein hum bhi hain

idhar bhi chashm-e-guhar-bar dekhne wale

kabhi na uljhegi mujh se ye gardish-e-ayyam

mujhe hain ahmad-e-muKHtar dekhne wale

siwae did-e-madina 'ilaj na-mumkin

ye jaan len mujhe bimar dekhne wale

nasib se mujhe ye gham mile hain ranj na kar

mujhe ghamon mein giraftar dekhne wale

surur-e-baada-e-hubb-e-nabi se be-KHud hun

meri nigahon se hushiyar dekhne wale

wafur-e-'ishq hi samjhenge meri na’ton ko

nigah-e-fan se qalam-kar dekhne wale

ba-faiz-e-sahib-e-me'raj 'ishq mein 'aKHtar'

hum aasman ke hain us par dekhne wale