ترے حضور میں سجدے گزارتا ہوں میں

ترے حضور میں سجدے گزارتا ہوں میں

اسی طرح سے مقدر سنوارتا ہوں میں

تجھے خبر ہے تجھے علم ہے تجھے معلوم

ہر ایک حال میں تجھ کو پکارتا ہوں میں

بچھی ہوئی ہے اسی طرح سے بساط الم

نہ جیتتا ہوں میں بازی نہ ہارتا ہوں میں

ترا کرم ہے کہ میں خود ہوں نا خدا اپنا

جو غرق ہوتی ہے کشتی ابھارتا ہوں میں

تو ہی علیم ہے تو ہی خبیر و قادر کل

تجھے خبر ہے کہ دل کس پہ وارتا ہوں میں

نہیں ہے تجھ پہ بھروسہ تو اور یہ کیا ہے

کہ دو جہان کو ٹھوکر پہ مارتا ہوں میں

بہا رہا ہوں جو آنسو یہ پے بہ پے بہزادؔ

کسی کے نام کے صدقے اتارتا ہوں میں