tujh bin taḌap rahe haiñ donoñ jahān vaale
ai zīnat-e-madīna ai ān-bān vaale
terī navāzishoñ se pur-nūr ho rahe haiñ
ye māh-o-mahr-o-anjum ye āsmān vaale
tere baġhair kuchh bhī un kī nahīñ haqīqat
tere nishāñ ke sadqe meñ haiñ nishān vaale
tū sāhib-e-haqīqat tū markaz-e-aqīdat
paḌhte haiñ terā kalima donoñ jahān vaale
tere hī āstāñ par sar ko jhukā rahe haiñ
dil vaale aañkh vaale sar vaale jaan vaale
zāhir kiyā tujhī ne ka.abe kī azmatoñ ko
ka.aba hai tere dam se ka.abe kī shaan vaale
'bahzād' merī āñkheñ rotī haiñ ashk-e-hasrat
jaate haiñ jab madīne hindostān vaale
tujh bin taDap rahe hain donon jahan wale
ai zinat-e-madina ai aan-ban wale
teri nawazishon se pur-nur ho rahe hain
ye mah-o-mahr-o-anjum ye aasman wale
tere baghair kuchh bhi un ki nahin haqiqat
tere nishan ke sadqe mein hain nishan wale
tu sahib-e-haqiqat tu markaz-e-aqidat
paDhte hain tera kalima donon jahan wale
tere hi aastan par sar ko jhuka rahe hain
dil wale aankh wale sar wale jaan wale
zahir kiya tujhi ne kabe ki azmaton ko
kaba hai tere dam se kabe ki shan wale
'bahzad' meri aankhen roti hain ashk-e-hasrat
jate hain jab madine hindostan wale
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.