tu maqsad-e-taKHliq hai tu hasil-e-iman

tū maqsad-e-taḳhlīq hai tū hāsil-e-īmāñ

jo tujh se gurezāñ vo ḳhudā se hai gurezāñ

kirdār kā ye haal sadāqat hī sadāqat

aḳhlāq kā ye rang ki qur.ān hī qur.āñ

kyā naam hai shāmil jo hai takbīr-o-azāñ meñ

is naam kī azmat ke haiñ qurbān dil-o-jāñ

ashkoñ se tire diin kī khetī huī sairāb

fāqoñ ne tire dahr ko baḳhshā sar-o-sāmāñ

insān ko shā.ista-o-ḳhud.dār banāyā

tahzīb-o-tamaddun tire sharminda-e-ehsāñ

rahmat kā ye aalam hai muravvat kā ye andāz

'māhir' sā gunahgār hai vābasta-e-dāmāñ

tu maqsad-e-taKHliq hai tu hasil-e-iman

jo tujh se gurezan wo KHuda se hai gurezan

kirdar ka ye haal sadaqat hi sadaqat

aKHlaq ka ye rang ki quran hi quran

kya nam hai shamil jo hai takbir-o-azan mein

is nam ki azmat ke hain qurban dil-o-jaan

ashkon se tere din ki kheti hui sairab

faqon ne tere dahr ko baKHsha sar-o-saman

insan ko shaista-o-KHuddar banaya

tahzib-o-tamaddun tere sharminda-e-ehsan

rahmat ka ye aalam hai murawwat ka ye andaz

'mahir' sa gunahgar hai wabasta-e-daman