al-butraa

kitne samundar

kitne sahraa

jangal aur baarishe.n

be-shumaar aa.iino.n kaa KHaalii-pan

lamhe yaa sadiyaa.n

ubuur kar ke

daaKHil hu.ii

merii tanhaa.ii

terii tanhaa.ii me.n

ai shahar-e-gul-e-surKH

ai aziim KHuubsuurat patthar

mujhe KHazaane se

ko.ii sarokaar nahii.n

jahaa.n khuu.nTe se ba.ndhaa

laal gho.Daa

te.iis sau baras

kii be-KHvaabii me.n

iistaada hai

mujhe faqat terii udaas raat kaa

ek konaa darkaar hai

ki merii KHaamoshii

terii KHaamoshii se kalaam kare

mere paas afsos kii kahaanii hai

jise sun kar qadiim chaa.nd

ret ke aa.nsuu bahaa.egaa

ki tere maatamii gulaab sairaab ho.n

u.Dte zamaano.n kii dhajjiyaa.n

gum-shuda umro.n kii raa.igaanii

taariiKH kii munaafiq almaariyo.n me.n

laTakte ustuKHvaa.n

mujhe amaanat-daar paa.e.nge

barbaad diivaaro.n kii KHaraasho.n se

jhaa.nktaa inhimaak nahii.n TuuTegaa

ai gulaab shahr

mai.n be-zabaan qissa-go

ek shab-basarii kaa savaalii huu.n

tere sangiin darvaaze par

mai.n tujhe tere jaisaa

apnaa dil hadiya karuu.ngaa

patthar kaa gulaab

tujhe KHaamosh daastaan sunaa.uu.ngaa

kisii bahut qadiim zamaane kii

gunaahgaar KHudaa.o.n se duur

KHaalis ibaadat guzaar a.ndhere me.n

sub.h-e-abad ke aaKHirii qahqahe se be-niyaaz

kitne samundar

kitne sahraa

jangal aur baarishe.n

be-shumaar aa.iino.n kaa KHaalii-pan

lamhe yaa sadiyaa.n

ubuur kar ke

daaKHil hu.ii

merii tanhaa.ii

terii tanhaa.ii me.n

ai shahar-e-gul-e-surKH

ai aziim KHuubsuurat patthar

mujhe KHazaane se

ko.ii sarokaar nahii.n

jahaa.n khuu.nTe se ba.ndhaa

laal gho.Daa

te.iis sau baras

kii be-KHvaabii me.n

iistaada hai

mujhe faqat terii udaas raat kaa

ek konaa darkaar hai

ki merii KHaamoshii

terii KHaamoshii se kalaam kare

mere paas afsos kii kahaanii hai

jise sun kar qadiim chaa.nd

ret ke aa.nsuu bahaa.egaa

ki tere maatamii gulaab sairaab ho.n

u.Dte zamaano.n kii dhajjiyaa.n

gum-shuda umro.n kii raa.igaanii

taariiKH kii munaafiq almaariyo.n me.n

laTakte ustuKHvaa.n

mujhe amaanat-daar paa.e.nge

barbaad diivaaro.n kii KHaraasho.n se

jhaa.nktaa inhimaak nahii.n TuuTegaa

ai gulaab shahr

mai.n be-zabaan qissa-go

ek shab-basarii kaa savaalii huu.n

tere sangiin darvaaze par

mai.n tujhe tere jaisaa

apnaa dil hadiya karuu.ngaa

patthar kaa gulaab

tujhe KHaamosh daastaan sunaa.uu.ngaa

kisii bahut qadiim zamaane kii

gunaahgaar KHudaa.o.n se duur

KHaalis ibaadat guzaar a.ndhere me.n

sub.h-e-abad ke aaKHirii qahqahe se be-niyaaz