چوتھے لمحے کی تنہائی

یہ ان روشن دنوں کی بات ہے

جن کی شفق صبحوں سے

سرخی ادھار لے کر

میں تمہارا خیال سنوارتی

تو

پرندے محبت کی نظمیں گاتے

میری روح کو گدگداتے

نیل گگن میں جھومتے رہتے تھے

یہ وہی دن ہیں

مگر

ان کی صبحیں سونی ہیں

اور شامیں روز

میرے پاس رکھی

تمہاری سنہری یادوں کا کچھ حصہ لے کر

خود کو سنوارتی ہیں

پرندے محبت کی نظمیں بھول چکے ہیں

وہ

میری اور دیکھتے ہیں

اور پلٹ جاتے ہیں

میں ان کی بولی بھول چکی ہوں

جیسے تمہارا خیال

جو اب میرے پاس نہیں رہا