gunaahgaar shaa.ir key be-gunaah nazme.n

kal merii do nazme.n baazaar ga.ii.n

jo ju.Dvaa.n bahne.n thii.n

magar vaapas nahii.n lauTii.n

in dino.n curfew ke baa.is

khule-aam ghuumnaa mamnuu.a thaa

lekin mai.n ne din kii raftaar se tez bhaagte hu.e

shahr kaa chakkar kaaTaa

raat ke saa.e ke Dar se

masjido.n me.n elaan karvaa.e ga.e

magar dahshat ke bistar me.n dubke log

kuchh nahii.n jaante

kis kii phaTii e.Diyo.n se ristaa KHuun

lakiire.n khii.nch rahaa hai

aaKHir afsurdagii se diivaar me.n lagaa T v on kiyaa

super-market dhamaake se u.Daa dii ga.ii

mai.n bhaagtaa jaa-e-vaquu.a pahu.nchaa magar

paanii se maut ke nishaan

gutter me.n bahaa.e jaa chuke the

ab be-yaqiinii ke cigarette phuu.nktaa

qabro.n ke paas baiThaa huu.n

jahaa.n bam dhamaake me.n mirii ruuhe.n dafn hai.n

magar merii nazmo.n kii qabr kaun sii hai

ki miTTii ke chehre se pahchaan mumkin nahii.n

aur mai.n

marne se pahle katba lagaanaa chaahtaa huu.n

yahaa.n gunahgaar shaa.ir kii be-gunaah nazme.n dafn hai.n

kal merii do nazme.n baazaar ga.ii.n

jo ju.Dvaa.n bahne.n thii.n

magar vaapas nahii.n lauTii.n

in dino.n curfew ke baa.is

khule-aam ghuumnaa mamnuu.a thaa

lekin mai.n ne din kii raftaar se tez bhaagte hu.e

shahr kaa chakkar kaaTaa

raat ke saa.e ke Dar se

masjido.n me.n elaan karvaa.e ga.e

magar dahshat ke bistar me.n dubke log

kuchh nahii.n jaante

kis kii phaTii e.Diyo.n se ristaa KHuun

lakiire.n khii.nch rahaa hai

aaKHir afsurdagii se diivaar me.n lagaa T v on kiyaa

super-market dhamaake se u.Daa dii ga.ii

mai.n bhaagtaa jaa-e-vaquu.a pahu.nchaa magar

paanii se maut ke nishaan

gutter me.n bahaa.e jaa chuke the

ab be-yaqiinii ke cigarette phuu.nktaa

qabro.n ke paas baiThaa huu.n

jahaa.n bam dhamaake me.n mirii ruuhe.n dafn hai.n

magar merii nazmo.n kii qabr kaun sii hai

ki miTTii ke chehre se pahchaan mumkin nahii.n

aur mai.n

marne se pahle katba lagaanaa chaahtaa huu.n

yahaa.n gunahgaar shaa.ir kii be-gunaah nazme.n dafn hai.n