رات عدالت ہے

ہم کٹہرے میں کھڑے ہیں

سورج سے بغاوت کے الزام میں

سورج سے بغاوت ہمارا حق ہے

جب صدیوں سے ہمارا خطہ

روشنی سے خالی ہے

اور دوسری جانب روشنی کا سمندر

ٹھاٹھیں مارتا ہے

تازہ سوال تازہ جواب مانگتے ہیں

مگر ہم اس زمانے میں پیدا ہوئے

جہاں تقلید کے صحیفے پڑھنے والا

مقدس ہے

دیوتا ہے

کون جانتا ہے

کس کا کیا جرم ہے

ہمیں کٹہرے میں کھڑا کون کر گیا

اور فیصلہ کون سنائے گا

جب رات عدالت ہے

دن کی کوئی امید نہیں

ہم پلوٹو کے باسی ہیں

زمین سے ہمارا کوئی رشتہ نہیں