dilli aur hum

ye vo dillī hai ki dil se jis ke dīvāne haiñ ham

ye vo sham-e-zindagī hai jis ke parvāne haiñ ham

aa.ina hai ham se us ke ahd-e-zarrīñ kī jhalak

us ke tahzīb-o-adab ke ā.īna-ḳhāne haiñ ham

ilm-o-fan ke motiyoñ pe jam gayā gard-o-ġhubār

ḳhaak ke zarrāt meñ malbūs durdāne haiñ ham

ham pe rahtī hai nigāh-e-shafqat-e-ahl-e-nazar

mahfil-e-sher-o-adab meñ jāne-pahchāne haiñ ham

hāzir-e-ḳhidmat kiyā hai jauhar-e-qalb-o-dimāġh

kam-nigāhoñ kī nazar meñ phir bhī begāne haiñ ham

ab to ḳhvesh vaġhaira kahte haiñ hameñ kuchh aur hī

jab to ik duniyā samjho thī ki farzāne haiñ ham

tamkanat 'saudā' kī 'tālib' 'mīr' kā rakhte haiñ 'dard'

baaġh to jaane hai saarā par na kuchh jaane haiñ ham

ye wo dilli hai ki dil se jis ke diwane hain hum

ye wo sham-e-zindagi hai jis ke parwane hain hum

aaina hai hum se us ke ahd-e-zarrin ki jhalak

us ke tahzib-o-adab ke aaina-KHane hain hum

ilm-o-fan ke motiyon pe jam gaya gard-o-ghubar

KHak ke zarraat mein malbus durdane hain hum

hum pe rahti hai nigah-e-shafqat-e-ahl-e-nazar

mahfil-e-sher-o-adab mein jaane-pahchane hain hum

hazir-e-KHidmat kiya hai jauhar-e-qalb-o-dimagh

kam-nigahon ki nazar mein phir bhi begane hain hum

ab to KHwesh waghaira kahte hain hamein kuchh aur hi

jab to ek duniya samjho thi ki farzane hain hum

tamkanat 'sauda' ki 'talib' 'mir' ka rakhte hain 'dard'

bagh to jaane hai sara par na kuchh jaane hain hum