baada-e-ishq se sarshaar guru-nanak the

bāda-e-ishq se sarshār gurū-nānak the

ābid-o-zāhid-o-dīñ-dār gurū-nānak the

rah-e-tārīk-e-zalālat meñ pa.e ḳhalq-e-ḳhudā

sham-sā mazhar-e-anvār gurū-nānak the

haq-parastī ke tasavvur se hamesha ḳhush the

kufr aur shirk se bezār gurū-nānak the

tarbiyat ḳhalq kī karte the baḌī koshish se

us ke har haal meñ ġham-ḳhvār gurū-nānak the

abr-e-naisāñ kā ḳhavās un kī nasīhat meñ thā

lab-e-shīrīñ se guhar-bār gurū-nānak the

vāsil-e-mazil-e-maqsūd na hote kyūñkar

faras-e-ishq pe asvār gurū-nānak the

rāh-e-haq meñ na the pāband kisī maz.hab ke

tārik-e-subah-o-zunnār gurū-nānak the

ḳhvāb-e-ġhaflat se vo bedār kiyā karte the

vā.izoñ meñ baḌe hoshiyār gurū-nānak the

mad.h-ḳhvāñ us kā tū ho 'barq' ba-sad ijz-o-niyāz

ḳhāksāroñ ke madad-gār gurū-nānak the

baada-e-ishq se sarshaar guru-nanak the

aabid-o-zahid-o-din-dar guru-nanak the

rah-e-tarik-e-zalalat mein pae KHalq-e-KHuda

sham-sa mazhar-e-anwar guru-nanak the

haq-parasti ke tasawwur se hamesha KHush the

kufr aur shirk se bezar guru-nanak the

tarbiyat KHalq ki karte the baDi koshish se

us ke har haal mein gham-KHwar guru-nanak the

abr-e-naisan ka KHawas un ki nasihat mein tha

lab-e-shirin se guhar-bar guru-nanak the

wasil-e-mazil-e-maqsud na hote kyunkar

faras-e-ishq pe aswar guru-nanak the

rah-e-haq mein na the paband kisi mazhab ke

tarik-e-subah-o-zunnar guru-nanak the

KHwab-e-ghaflat se wo bedar kiya karte the

waizon mein baDe hoshiyar guru-nanak the

madh-KHwan us ka tu ho 'barq' ba-sad ijz-o-niyaz

KHaksaron ke madad-gar guru-nanak the