nanak

qaum ne paiġhām-e-gautam kī zarā parvā na kī

qadr pahchānī na apne gauhar-e-yak-dāna kī

aah bad-qismat rahe āvāz-e-haq se be-ḳhabar

ġhāfil apne phal kī shīrīnī se hotā hai shajar

āshkār us ne kiyā jo zindagī kā raaz thā

hind ko lekin ḳhayālī falsafa par naaz thā

sham-e-haq se jo munavvar ho ye vo mahfil na thī

bārish-e-rahmat huī lekin zamīñ qābil na thī

aah shūdar ke liye hindostāñ ġham-ḳhāna hai

dard-e-insānī se is bastī kā dil begāna hai

barhaman sarshār hai ab tak mai-e-pindār meñ

sham-e-gautam jal rahī hai mahfil-e-aġhyār meñ

but-kada phir baad muddat ke magar raushan huā

nūr-e-ibrāhīm se aazar kā ghar raushan huā

phir uThī āḳhir sadā tauhīd kī punjab se

hind ko ik mard-e-kāmil ne jagāyā ḳhvāb se

qaum ne paigham-e-gautam ki zara parwa na ki

qadr pahchani na apne gauhar-e-yak-dana ki

aah bad-qismat rahe aawaz-e-haq se be-KHabar

ghafil apne phal ki shirini se hota hai shajar

aashkar us ne kiya jo zindagi ka raaz tha

hind ko lekin KHayali falsafa par naz tha

sham-e-haq se jo munawwar ho ye wo mahfil na thi

barish-e-rahmat hui lekin zamin qabil na thi

aah shudar ke liye hindostan gham-KHana hai

dard-e-insani se is basti ka dil begana hai

barhaman sarshaar hai ab tak mai-e-pindar mein

sham-e-gautam jal rahi hai mahfil-e-aghyar mein

but-kada phir baad muddat ke magar raushan hua

nur-e-ibrahim se aazar ka ghar raushan hua

phir uThi aaKHir sada tauhid ki punjab se

hind ko ek mard-e-kaamil ne jagaya KHwab se